2Jo | MCQ | STEP |

2 Joni

2 John

Vu'a Anejijihina

1 Na eruta napara ka'ene iji pijahajine 'ee sesahwaha ka'ene nara nimaa vajijino oja mihujiru pana vo ea maho'o nimaiji hena kavi'inijihi puna'e veju. 2 Nimaa ka'ene núni vaji name 'ee majama nama vahuni jihuni hahi veju. 3 Maiji vwihanúana 'ee numirumana 'ee matauvi'ina ka'ene Godi Amo 'ee Jesu Keriso ka'ene Amo oni Harihi jihuni nimaa 'ee oja mihujaho nú pu'úmuna.

Hura 'Warama Ja'ina'e O'avara

4 Na sesahu jona 'aho'a ki'eme nimai jihuni vaji 'urahojajaho na teamanimana. Areri núra vehuna ka'ene Amouna'i apeja ja'ina vejara. 5 'Enakaivo na iviamaa napara kera a 'waravu na tamana pina maiu'ina paveju kaivo núra nimarako amura hejara ka'ene ea 'aho pu'úmo oja ma'arahuna ka'ene 'waramaji veju. 6 Oja 'ekaravujaho Huni tamanijara 'warama ja'ina'e 'uraha ohuna. Ikaho tamana ka'ene jara nitama hejajina'omo ja ijihunijino 'urahe ohuna. 7 Ira'asina mapoka iki mwe'i ani rene va'u. 'Ena'omo pu Jesu Kerisoho haha paapenana 'wavura. Pu niho'o ira'asine 'ee Keriso oni nana'eji'ina. 8 Nú raka ka'ene ja najahume rejajaho hami 'ajohakame papa'are'ama jihuna'e nú ja pu'úmo eha mamaa maho'o areri apehuna. 9 Ea irara Kerisora najahuji pave'i kaivo karokaha venujaho Godi huni oja vaja pahinu. Ea irara Kerisora najahuji venujaho Omahe'o Hariahe'o huni oja vaji hiju. 10 Ea 'ahopo ja naja'iro ro'i kaivo ijí raka ka'ene najahaji paapene roa ki'avajaho pa'warave joni sea roe 'ee pa'ajo'avara. 11 Ea ija'iniji kame a 'ajo'amajaho hura sisea venuja'ina'e a areri sisea ija'ina vehuna.

Vu'a Túchamaijina

12 Na ura ja mapoka 'warahuna ura reniu kaivo na heha 'ahi vehuna ura pareniu. 'Ena'omo na vu'areje joni una'i urania kakaravi'i 'waravakame nú ja pu'úmo niho'o temari itu'ona parahuna. 13 Joni 'u'ua ka'ene Godi iji pijaha jihipuni ehipo ja 'ajoravu.